“Biznesi në vështirësi”, Partia Demokratike akuza qeverisë për planin ekonomik

Nëpërmjet një video-mesazhi të një sipërmarrësi të shpërndarë në media, Partia Demokratike akuzoi qeverinë se me planin e saj ekonomik nuk i vjen në ndihme as qytetarëve as biznesit.

Ardian Boja, sipërmarrës në një biznes artizanal theksoi se goditjen më të rëndë e kishte marrë gjatë periudhës së pandemisë si edhe taksat e qeverisë janë të papërballueshme.

 “Pjesa e pandemisë, neve na la pa punë. Përfitimet nuk i kemi marrë, përveçse unë si person, stafi nuk i mori, nuk u përfshi nga ato. Ne kemi 12 taksa dhe tarifa. Ne paguajmë 3 herë TVSH-në e materialit, një herë te distributori i madh, e dyta që furnizohem unë dhe e treta kur ja çojmë klientit”, theksoi ai.

Për të ilustruar vështirësitë ekonomike që po hasin sipërmarrësit e vegjël në vend, Ardian Boja theksoi se për të paguar taksat i nevojitet të marrë kredi.

“Ne mbijetojmë. Marrim kredi për të paguar taksat”, tha ai.