Betohen 19 gjyqtarë të rinj, Llagami: Kemi nevojë për gjyqtarë profesionalë

19 gjyqtarë të rinj që kanë përfunduar Shkollën e Magjistraturës janë betuar këtë të mërkurë dhe tashmë janë të gatshëm për t’u bërë pjesë e sistemit të ri të drejtësisë.

Ata do të shërbejnë në gjykatat e shkallës së parë të ndryshme të vendit ndërsa në ceremoninë e betimit ishin të pranishëm personalitete në fushën e drejtësisë.

Kryetarja e Këshillit të Lartë Gjyqësor, Naureda Llagami tha se sistemi gjyqësor sot ka nevojë më shumë se kurrë sot për gjyqtarët e rinj me aftësi të larta profesionale dhe njerëzore.

Ndërkohë që procesi i vetingut vijon ende, deri tani janë krijuar shumë pozicione vakante në të gjitha gjykatat e vendit, deri tek Gjykata Kushtetuese dhe ajo e Lartë.

Plotësimi i Gjykatës Kushtetuese është një prej kushteve që BE ka vendosur për nisjen e negociatave për anëtarësimin në union dhe kjo pritet të bëhet brenda këtij viti.

Aktualisht kjo gjykatë ka vetëm 4 nga 9 anëtarë gjithsej dhe nevojitet të paktën dhe emërimi i dy anëtarëve për të plotësuar kuorumin e nevojshëm për vendimmarrje.