Karnavalet e Shkodrës, festa e veçantë që organizohet prej 162 vitesh

Në qytetin e Shkodrës janë festuar Karnavalet. Tradita 162-vjeçare e këtij aktiviteti edhe këtë herë ka pasur në qendër të saj ironinë dhe talljen me fenomenet e shoqërisë.

Shkodra festoi këtë diel 162-vjetorin e karnavaleve tradicionalë duke kthyer rrugët dhe shëtitoret e qytetit në festë.

“Po lehim si qeni n’hanë” ishte fabula e këtij viti duke vënë kështu në lojë pushtetin si dhe veset dhe gjërat që nuk po shkojnë si duhet me shoqërinë.

Humoristi Qazim Qela prej vitesh është pjesë e organizimeve të karnavaleve duke i vlerësuar si shumë të rëndësishme për qytetin.

“Karnavalet janë një festë e madhe për të gjithë Shkodrën, siç e shihni merr pjesë gjithë qyteti”- tha Qazim Qela humorist

Për organizatorin Gjon Stefa, karnavalet janë simbolikë e qytetit dhe përmes fabulës venë në lojë politikën dhe pushtetin.

“Deshëm të evidentojmë të metat që ka qyteti ynë gjatë këtij viti”- tha ai.

Mbështetja duhet të ishte më e madhe sipas Stefës.

“Ne bëjmë aq sa mundemi me bërë, por realisht qyteti ynë ka nevojë shumë më tepër për një angazhim më të madh. Duhet të kemi fonde nga bashkia”- theksoi ai.

Karnavalet janë një festë identifikuese për qytetin e Shkodrës i cili njihet ndryshe edhe si qyteti i maskave Venecian që furnizojnë të gjithë Evropën.

LEXONI GJITHASHTU: 

• Evi Kokalari nis lëvizjen Konservatore, thërret qytetarët në takimin e parë
• Tërmeti/ Njerëzit vendosen tullumbace në rrënoja për të nderuar fëmijët viktima