Artan Lame kërkon hetime për floririn e zhdukur të Mbretit Zog, reagon Princ Leka

Drejtori i Kadastrës, Artan Lame, i cili njihet edhe si studiues e koleksionist, ka bërë thirrje për hetime në lidhje me sasinë e floririt që Mbreti Zog mori me vete kur u largua nga Shqipëria në vitin 1939.

Në emisionin “Now” në Euronews Albania”, Lame u shpreh se Princ Leka, si trashëgimtar i fronit, duhet t’i japë llogari shtetit shqiptar për këtë çështje.

“E para, dokumenti ka nevojë për hetim të mëtejshëm. E dyta, unë nuk e besoj farë këtë zotërinë Gjonin. E treta, shteti shqiptar përsa kohë edhe e pranoi të kthehej në Shqipëri Princ Lekën dhe familjen mbretërore, unë jam nga ata që them po, duhej pranuar që të ktheheshin në Shqipëri, duke dhënë disa llogari.

Si trashëgimtar i fronit është dikush dhe ka llogari për të dhënë para shtetit shqiptar dhe shteti shqiptar ka detyrime ndaj tij për atë që përfaqëson”, theksoi ai.

Ndërkaq, Princ Leka reagoi zyrtarisht për emisionin duke theksuar se vendi ka nevojë për ndershmëri intelektuale dhe pedagogji të mirëfilltë në shkrimin dhe transmetimin e historisë.

Gjatë transmetimit, ai pati dhe një ndërhyrje ku nëpërmjet një mesazhi i komunikoi moderatores Erla Mëhilli se: “Ka pasur një komision hetimor në fillim të viteve 90’ për këtë çështje”, duke iu përgjigjur kështu Artan Lames.

Ndër të tjera, studiuesi Erald Kapri sqaroi se komisioni eshte drejtuar nga deputeti Blerim Çela dhe ka trajtuar edhe arin e marrë nga Banka e Shtetit.

LEXONI GJITHASHTU

• Pse e mori Ahmet Zogu floririn? Ja çfarë bëri mbreti me pasurinë
• Floriri që u zhduk| Drejtori i Arkivës: Ahmet Zogu mori 40 milionë dollarë me vete
• Drejtori i Arkivës: Pse publikuam dokumentin sekret të floririt që mori me vete Zogu