SHBA-BE përshëndesin ngritjen e SPAK: Fundi i të paprekshmëve dhe pandëshkueshmërisë

Menjëherë pas betimit të prokurorëve të SPAK kanë reaguar dhe dy përfaqësitë më të rëndësishme diplomatike në Shqipëri. Ambasada Amerikane e cilësoi një ditë të rëndësishme për Shqipërinë, pasi tani ka një trupë prokurorësh që do hetojë bosët e krimit dhe zyrtarët e korruptuar. SHBA inkurajon Strukturën e Posaçme Anti-Korrupsion dhe Krim i Organizuar (SPAK) në luftën kundër pandëshkueshmërisë.

[twitter_feed=https://twitter.com/USEmbassyTirana/status/1207588849754558465]

“Nga dita e sotme, Shqipëria ka një organ prokurorësh të angazhuar për të identifikuar, hetuar dhe vënë përpara drejtësisë zyrtarë të kaluar apo aktualë dhe bosë të krimit – individë që në kohët e vjetra janë konsideruar si të paprekshëm. Ndërsa Shqipëria nis një fazë të re të zhvillimit të saj demokratik dhe ligjor, Shtetet e Bashkuara do të mbeten një partner i palëkundur në mbështetje të SPAK dhe të të gjithë atyre që kërkojnë ti japin fund pandëshkueshmërisë dhe të sjellin drejtësi për popullin shqiptar”, – thuhet mes të tjerash në postimin e Ambasadës së SHBA.

[twitter_feed=https://twitter.com/EUinAlbania/status/1207589614111928320]

Ndërsa në një reagim në Twitter, ambasadori i Bashkimit Europian, Luigi Soreca e cilësoi këtë një moment të rëndësishme të zbatimit të reformës në drejtësi dhe në luftë kundër krimit të organizuar dhe korrupsionit me qëllim anëtarësimin në BE.