Dhuna ndaj Petraq Milos, Rama: Falenderoj Dritanin për kërkimin e ndjesës

Kryeministri Edi Rama, foli gjatë konferencës së përbashkët për shtyp me kryeministrin Abazoviç dhe për dhunën e ushtruar nga policia malazeze ndaj profesorit, Petraq Milo.

Rama falenderoi kryeministrin malazez për kërkimin e ndjesës ndaj profesorit, si dhe theksoi se këto raste duhet të shërbejnë që të rritet më shumë bashkëpunimi rajonal mes dy vendeve.

“Dua ta falenderoj për faktin që në sekondin e parë të daljes së asaj videos së shëmtuar i ka telefonuar profesorit dhe i kërkuar ndjesë ai dhe ministri i Brendshëm. Janë marrë të gjitha masat për personat në fjalë.

E gjitha kjo është bërë me një xhentilesë maksimale dhe me një urtësi maksimale. Janë raste që ndodhin, u ndodhin dhe shqiptarëve me policinë shqiptare apo malazezëve me policinë malazeze. Këto janë rastet që mezi i presin për të ndezur flakën e nacionalizmit dhe për të kërkuar që të ndërpriten marrëdhëniet diplomatike. Ndaj na duhet më shumë bashkëpunim rajonal”, tha Rama.

Rama shtoi se ndaj personave përgjegjës është marrë çdo masë brenda ligjit.

“Ndërkohë kryeministri i kishte bërë të gjitha gjërat që duhet të bënte, edhe kërkim faljen edhe për procedimin e personave përgjegjës, dhe e gjitha kjo është bërë me xhentilesë. Dhe në rast se pyetja pa dashje është kur do të pushkatohen ata që e bënë këtë punë në dijeninë time, Mali i Zi e ka hequr dënimin me vdekje. Jam i bindur që Dritani do të donte ta pushkatonte, por nuk e bën dot”, tha Rama.

LEXONI GJITHASHTU: 

• Rama i “ngec” urën Abazoviç: Ju keni paga me të larta, projektin zbatojeni ju 
• Dhuna ndaj Petraq Milos, Abazoviç kërkon falje: Nuk e ka prishur radhën