Artan Shkreli: Ja banesat që do t’i nënshtrohen auditimit teknik

Drejtori i Institutit të Ndërtimit, Artan Shkreli thotë se qeveria nuk ka marrë vendim për shembjen e banesave mbi 50-vjeçare.

Në një intervistë për Euronews Albania, Shkreli u shpreh se ka një rregullim ligjor, ku thuhet se të gjitha objektet që kanë mbi 50 vjet që janë ndërtuar, i nënshtrohen procesit të auditimit teknik.

“Nuk është marrë asnjë vendim nga qeveria. Ka vetëm një rregullim ligjor, i cili ka ndodhur mbi dy vite më parë, në janar të 2020, në ligjin për kontrollin dhe disiplinimin e punimeve të ndërtimit, është bërë një shtesë pas tërmetit të 2019, me nenin 4/1, ku thuhet se të gjitha objektet që kanë mbi 50 vjet që janë ndërtuar, i nënshtrohen procesit të auditimit teknik. Prej dy vitesh ekziston ky nen në ligjin përkatës, i cili pritet të plotësohet me akte nënligjore”, theksoi ai.