Mësuesi që u bë koleksionist, në muzeun e tij etnografik objekte mbi 200-vjeçare

Ky është koleksionisti i apasionuar Ndoc Shaben, nga fshati Plezhe.

Pjesën më të madhe të jetës ia ka kushtuar arsimit ndërsa tani në pension i është përkushtuar ëndrrës së tij, ndërtimit të një muzeu etnografik në Zadrimë.

“Të qenët edhe mësues i gjuhe-letërsisë të jep edhe shanse të tjera për të njohur diçka nga afër edhe përtej letrave pra edhe kulturën materiale shpirtërore të kombit ku jeton”, thotw Ndoc Shaben.

Muzeu i tij modest etnografik “Albania Nord“ në rrugën nacionale Shkodër – Lezhë i ka mahnitur të gjithë.

“Për nga numri shkojnë rreth afër 3 mijë objekte. Për nga rëndësia varet. Ka dhe objekte tw cilat nuk janw shumë të rëndësishme sot, por që në një ditë tjetër, kohë tjetër, marrin vlerat e veta dhe ato”, shprehet ai.

Por cilat janë disa nga koleksionet “relike” të këtij muzeu?

“Ndër objektet më të rëndësishme të veshjes karakteristike të zonës së Zadrimws janë pjesët e metalta, të cilat janë dekor për nuset e hershme të Zadrimës. Këto materiale janë duke filluar nga fudullat, sumllat, kryqi, janë pjesët e dekorit të gjoksit”, tregon Ndoci.

Edhe ky gramafon është i ruajtur si i ri, duke qenë një ndër reliket e këtij muzeu.

Përveç pasionit të Ndocit, a kanë ndihmuar autoritetet që kjo pasuri të ruhet?

“Për fatin e keq nuk është afruar asnjë lloj bashkëpunimi as nga pushteti qendror, as nga pushteti vendor, as nga tipa donatorësh as nga dashamirës të tjerë, gjithçka është me forcat e veta, me parimin e vjetër ish-socialist, i mbështetur në forcat e veta”, thotë koleksionisti.

Vullnetin, pasionin dhe dëshirën Ndoci ende i ka në nivele të larta ndonëse vitet i rëndojnë mbi supe. Me buzën në gaz na thotë se s’do ndalet kurrë dhe me pensionin e tij do vijojë të pasurojë koleksionin që ka, por shpreson që një ditë autoritetet ta ndihmojnë që ky muze të bëhet i vizitueshëm dhe për turistët.

LEXONI GJITHASHTU:

• Muzeu në Korçë flet në gjuhën ukrainase, Olena Zelenska mesazh shqiptarëve
• Muzeu Besa, Rama: Do tregojë si hebrenjtë u shpëtuan nga myslimanë e të krishterë