Opozita turke emëron një kundërshtar të Erdogan në zgjedhjet e ardhshme

Koalicioni i opozitës turke zgjodhi sot liderin e opozitës Kemal Kilicdaroglu si kundërshtarin kryesor të presidentit Recep Tayyip Erdogan në zgjedhjet e ardhshme presidenciale, raportoi Reuters.

Kilicdaroglu, 74 vjeç, kryetar i Partisë Popullore Republikane (CHP), partia e dytë më e madhe, do të përpiqet të zëvendësojë Erdoganin pas dy dekadash sundimi.

“Tryeza jonë është tavolina e paqes. Qëllimi ynë i vetëm është ta kthejmë vendin në ditët e begatisë, paqes dhe gëzimit”, tha ai.

Sipas sondazheve, votimi do të jetë i ngushtë, pasi blloku opozitar është pak përpara aleancës në pushtet.

Koalicioni i opozitës është zotuar të ndryshojë politikat e Erdoganit në shumë fusha, si ekonomia, të drejtat civile dhe punët e jashtme.

Ish-nëpunësi civil Kilicdaroglu mund të përfitojë nga vitet e krizës ekonomike dhe inflacioni në rritje, si dhe nga tërmetet shkatërruese në jug të vendit që kanë vrarë më shumë se 46.000 njerëz, duke përfshirë pakënaqësinë e gjerë publike me reagimin e shtetit ndaj katastrofës.

Sipas Reuters, votuesit do të vendosin jo vetëm se kush do ta udhëheqë Turqinë, por edhe se si do të qeverisë vendin, drejtimin e ekonomisë dhe rolin që Turqia do të luajë në zbutjen e konflikteve në Ukrainë dhe Lindjen e Mesme.

LEXONI GJITHASHTU:

• Tërmeti në Turqi, Erdogan: Nuk do të ketë pallate të reja me më shumë se 4 kate
• A e duan më turqit presidentin Erdogan? Gazetari analizon situatën pas tërmetit