U vetëdorëzua në gjykatë, GJKKO lë në burg juristin e Bashkisë Bulqizë

Gjykata Kundër Korrupsionit dhe Krimit të Organizuar, ka rikonfirmuar masën e caktuar në mungesë “arrest me burg” për Leonard Daçi, jurist në Bashkinë e Bulqizës, pjesë e grupit të zyrtareve të këtij institucioni që u arrestuan, përfshirë kryebashkiakun Lefter Alla.

Ai u vetëdorëzua të shtunën në Gjykaten e Posaçme. Daçi u paraqit befas në GJKKO rreth 2 orë pas nisjes së seancës për caktimin e masës së sigurisë.

Daçi erdhi i shoqëruar nga avokati Arben Peci, ku trokiti në dyert e sallës duke vënë në dijeni Gjykatën se ishte një nga të pandehurit e dosjes, dhe ndaj tij ishte marrë në mungesë masa e sigurisë “Arrest me burg”.

Më herët, GJKKO ka lënë në fuqi masën e sigurisë “Arrest në burg” kryebashkiakun e Bulqizës, Lefter Alla dhe 11 zyrtarët e tjerë të kësaj bashkie.

Alla është vënë pranga me urdhër të SPAK me akuzën e shpërdorimit të detyrës.

Përmes një njoftimi zyrtar, SPAK sqaron se është arrestuar edhe nënkryetari i bashkisë dhe 9 persona të tjerë të cilët në bashkëpunim me njëri-tjetrin kanë konsumuar veprën penale “Shkelje e barazisë së pjesëmarrësve në tenderë apo ankande publike”.

Shkelja e zyrtarëve të bashkisë ka të bëjë me një tender prej 3 mln eurosh për Ndërtimi rrjetit furnizimit dhe rrjetit shpërndarës Ujësjellësi dhe ndërtimi i rrjetit të KUZ, Lagja e vjetër, qyteti Bulqizë, Bashkia Bulqizë.

LEXONI GJITHASHTU

• Tenderi 3 mln euro, avokati i zyrtarit të Bashkisë Bulqizë: Paguhej 40 mijë lekë
• Tenderi 3 milionë euro, gjykata lë në burg kryebashkiakun e Bulqizës dhe 12 zyrtarët
• Habit juristi i bashkisë Bulqizë, ‘troket’ gjatë gjyqit: Dëgjova që jam i arrestuar