Hungaria nuk do ta arrestojë Vladimir Putin: S’ka bazë ligjore

Hungaria nuk do ta arrestojë presidentin rus Vladimir Putin nëse ai do të hyjë në vend, tha të enjten shefi i kabinetit të kryeministrit Viktor Orban.

Sipas tij, nuk ka asnjë bazë ligjore për t’u bërë një gjë e tillë.

Hungaria është nënshkruese dhe ratifikuese e Statutit të Romës që krijoi Gjykatën Penale Ndërkombëtare (ICC), e cila lëshoi një urdhër-arrestim për presidentin e Rusisë, Vladimir Putin, duke e akuzuar atë se është përgjegjës për dëbimin e paligjshëm të fëmijëve nga Ukraina, që përbën krim lufte.

I pyetur nëse Putini do të arrestohej nëse do të shkonte në Hungari, shefi i kabinetit të Orbanit, Gergely Gulyas, tha në një konferencë se Statuti i Romës nuk ishte ndërtuar në sistemin ligjor hungarez.

Ne mund t’i referohemi ligjit hungarez dhe bazuar në këtë nuk mund të arrestojmë Presidentin rus… pasi statuti i ICC nuk është shpallur në Hungari”, tha Gulyas.

Kur u pyet, ai tha se qeveria e tij “nuk kishte formuar një qëndrim” për urdhër-arrestimin e lëshuar kundër Putinit.

“Këto vendime nuk janë të duhura, pasi ato i çojnë gjërat drejt përshkallëzimit të mëtejshëm dhe jo drejt paqes, ky është mendimi im personal subjektiv”, shtoi Gulyas.

Rusia e ka cilësuar “skandaloz” vendimin e Gjykatës Penale Ndërkombëtare ndaj Putinit.

LEXONI GJITHASHTU:

• Hungaria shtyn sërish votimin për anëtarësimin e Suedisë dhe Finlandës në NATO
• Hungaria do të votojë në mars për pranimin e Finlandës dhe Suedisë në NATO