Bullgaria bllokon rrugën europiane të RMV-së, Ibrahim Mehmeti: Goditje shumë e rëndë për vendin

Bullgaria nuk ka pranuar kuadrin negociues me Maqedoninë e Veriut. Përmes një letre drejtuar Komisionit Europian theksohet se ky kuadër nuk i siguron garancitë e nevojshme për përmbushjen e kushteve të vendosura nga Bullgaria.

Gjithashtu, shteti bullgar kërkon që Maqedonia e Veriut të deklarojë se emri i saj i ri, nuk përfaqëson pretendime territoriale në rajonin gjeografik të Maqedonisë së Veriut, si dhe të mos kërkojë njohjen e pakicës maqedonase në Bullgari. Vendosja e “vetos” nga Bullgaria dhe bllokimi i konferencës së parë ndërqeveritare me BE-në ka shkaktuar zemërim në Shkupin zyrtar.

Analisti Ibrahim Mehmeti në një intervistë për gazetaren Bruna Çifligu në Euronews Albania tha se ky hap i Bullgarisë është një goditje e rëndë për rrugën europiane të RMV-së. Ai u shpreh se Maqedonia e Veriut ka nënshkruar një marrëveshje të fqinjësisë së mirë me Bullgarinë, por shtoi se mosplotësimi i pikave ka çuar në bllokimin e rrugës europiane.

 “Padyshim se kjo është një goditje shumë e rëndë për Maqedoninë e Veriut, sepse erdhi edhe papritmas pasi para tri vitesh RMV-ja nënshkroi një marrëveshje për fqinjësinë e mirë me Bullgarinë. Është vështirë të gjendet ndonjë gabim i madh nga ana e politikës në Maqedoninë e Veriut. Marrëveshja ka disa pika, që kërkojnë implementimin e tyre, të cilat nuk janë bërë”, shtoi ai.