EMRI| Me furgonin me armë drejt Anglisë, arrestohet 35-vjeçari në Portin e Durrësit

Policia Kufitare në Portin e Durrësit ka goditur një rast të tentativës për trafikim e armëve të zjarrit drejt Anglisë.

Në pranga ka përfunduar shtetasi Jetmir Koloshi, i cili me furgonin e tij transportonte mallra të ndryshme drejt Anglisë. Policia zbuloi se brenda një tavoline, 35-vjeçari kishte fshehur 8 armë zjarri tip pistoletë si dhe krehëra me municion luftarak.

Materialet në ngarkim të tij i kaluan prokurorisë për veprime të mëtejshme.

“Si rezultat i kontrollit të imtësishëm, duke përdorur edhe teknikat bashkëkohore për gjetjen e armëve të zjarrit dhe municionit, u bë e mundur që brenda një tavoline të gjendeshin 8 armë zjarri (pistoleta), krehëra me municion luftarak dhe aksesorë të ndryshëm armësh, të cilat u sekuestruan në cilësinë e provës materiale së bashku me 2 aparate celularë dhe një shumë parash.

Në vijim të veprimeve, drejtuesi i furgonit që transportonte mallrat, shtetasi J. K., 35 vjeç, banues në Tiranë, është arrestuar në flagrancë për veprën penale “Trafikimi i armëve dhe i municionit”.

Strukturat hetimore të DVP Durrës dhe ato të Departamentit të Policisë Kriminale, në bashkëpunim me SPAK-un po vijojnë veprimet e thelluara hetimore për zbardhjen e plotë të këtij rasti të trafikimit të armëve të zjarrit drejt Anglisë, si dhe për identifikimin dhe vënien përpara përgjegjësisë ligjore të shtetasve të tjerë të përfshirë në këtë veprimtari kriminale”, thuhet në njoftimin e policisë.

LEXONI GJITHASHTU: 

• Euronews Albania siguron fotot e mjetit që shpërtheu sapo Ndreca u fut në makinë
• Tritol makinës së kreut të ‘Rithemelimit’ në Vaun e Dejës, Bernard Ndreca