SHBA nëndetëse bërthamore në Azi, akord me Seulin për mbrojtjen nga Veriu

Një sulm bërthamor nga Koreja e Veriut do të shkaktonte fundin e regjimit të saj.

Paralajmërimi është bërë nga presidenti i Shteteve të Bashkuara, Joe Biden gjatë një konference të përbashkët për shtyp me homologun koreano-jugor, në Shtëpinë e Bardhë.

Dy liderët kanë bërë me dije se, Uashingtoni dhe Seuli kanë rënë dakord të përforcojnë mburojën bërthamore amerikane kundër kërcënimeve koreano-veriore.

“Paqen e vërtetë mund ta arrijmë përmes një force superiore dhe jo një paqe të rremë të bazuar tek vullneti i mirë i palës tjetër”, tha nga ana tjetër lideri koreano-jugor.

Në kuadër të marrëveshjes, Shtetet e Bashkuara do të dërgojnë nëndetëse me armë bërthamore në Korenë e Jugut dhe do të përfshijnë Seulin në planifikimin e operacioneve bërthamore. Në këmbim, Seuli zyrtar ka pranuar të mos prodhojë vet armë atomike.

Në vijim të fjalës së tij, presidenti Biden theksoi se, akordi i arritur do të përforcojë bashkëpunimin e aleatëve për t’i bërë kontrast rrezikut koreano-verior.

Shqetësimi për kërcënimin bërthamor të Penianit është rritur në muajt e fundit. Regjimi i vendit të izoluar aziatik po prodhon armatime bërthamore taktike që mund të godasin Jugun fqinj, si dhe po perfeksionon armët me rreze të gjatë veprimi që mund të arrijnë Shtetet e Bashkuara.

Mes të tjerash, Amerika ka një traktat që e detyron të mbrojë Korenë e Jugut dhe më herët ka paralajmëruar se do të përdorë armët bërthamore nëse do të jetë e nevojshme.

LEXONI GJITHASHTU:

• Biden shpall kandidaturën për president të SHBA: Të përfundojmë punën që nisëm
• SHBA i tregon forcën Dodik: Mos guxo të shtysh në konflikt Bosnjën!