Fier, sekuestrohen 1.5 mln euro pasuri me burim kriminal

Një pasuri me vlerë 1.5 milionë euro është vendosur në sekuestro nga policia e Fierit në kuadër të një hetimi disamujor të prokurorisë së këtij qyteti.

Në kuadër të operacionit të koduar “Kuadrati” u vunë në sekuestro dy apartamente, një restorant të vendosura në Vlorë dhe Pogradec dhe një automjet luksoz në emër të 49-vjeçares Rudina Hitaj.

Vendimi për ekzekutimin e sekuestros preventive për këto 4 pasuri me vlerë 1.5 milionë euro u mor më 26 nëntor nga Gjykata e Fierit pasi organi akuzës ngriti dyshime se ato ishin krijuar nga veprimtaria kriminale.

Konkretisht shumat e konfiskuara dyshohet se kanë origjinë veprimtarinë kriminale të ish-bashkëshortit të 49-vjeçares , Shaban Zenaj.

Ky i fundit është një emër i njohur për drejtësinë, në vitin 2015 ai u arrestua nga policia shqiptare në Vlorë dhe u ekstradua në Itali ku dhe po vuan dënimin me 14 vite burg për trafik të lëndëve narkotike .

Zenaj është edhe subjekt i operacionit forca e ligjit pasi në muajin qershor atij iu dërgua formulari vetëdeklarimit të pasurisë. Ndërkaq, po në kuadër të këtij operacioni vijojnë hetimet dhe verifikimet për evidentimin e pasurive të tjera që rezultojnë në emër të Shaban Zenajt apo personave të afërm me të.