Raketa në Zaporizhia, Kievi shtyn kundërofensivën në pritje të armëve

Tingujt e sirenave të sistemeve antiajrore u dëgjuan në Zaporizhia. Autoritetet ukrainase thanë se trupat ruse kishin sulmuar rajonin 70 herë në 24 orë.

Të paktën 8 persona kanë mbetur të plagosur si pasojë e bombardimeve që nuk kanë kursyer as godinat e banuara.

Megjithatë, Ministria ruse e Mbrojtjes ka mohuar zërat për luftime aktive në Zaporizhia dhe Kherson, pas pretendimeve për avancimin e trupave ukrainase në disa pika përgjatë frontit.

Moska insiston se ka zmbrapsur sulme të shumta ukrainase në drejtim të Donjeckut. Kjo, pasi presidenti ukrainas Volodymyr Zelensky deklaroi se kundërofensiva e pranverës do të presë mbërritjen e armëve të reja.

Por kryediplomati i BE-së, Josep Borrell ka deklaruar se Evropa është e angazhuar për të dërguar më shumë armë në Ukrainë.

Edhe Zvicra, që e ka debatuar dërgimin e armëve, tani është shprehur e hapur për lehtësimin e ligjeve të neutralitetit. Këshilli zviceran i Sigurisë ka caktuar rrugën e eksportit të armëve.

Ndërkohë, Shtetet e Bashkuara kanë mirëpritur premtimin e Afrikës së Jugut për të hetuar dyshimet për dërgimin e armëve në Rusi.

Ambasadori amerikan në Johanesburg ka akuzuar vendin se po furnizon Moskën me armë, pavarësisht neutralitetit të deklaruar lidhur me konfliktin në Ukrainë.

Presidenti afrikano-jugor ka deklaruar se ka mbetur i zhgënjyer nga qasja e Uashingtonit dhe ka kërkuar prova për pretendimet e bëra.

LEXONI GJITHASHTU:

• Borrell: Rusia dështoi, luftën në Ukrainë e ka humbur
• Ukraina përgatit kundërofensivën, vullnetarët në ndihmë të ushtrisë