S’ka fitues në derbi, Tirana e Partizani ndajnë pikët, java e 33 e Superligës

Mbi 15 mijë të pranishëm, spektakël, gola dhe nervozizëm, kjo ishte panorama e derbit të kryeqytetit mes Tiranës dhe Partizanit, i cili nuk pati fitues.

Kryesfida e javës së 33 u mbyll në shifrat 1-1, ndërsa nuk ndryshon renditja në tabelën e klasifikimit, me bardheblutë që udhëheqin me dy pikë më shumë. Pjesa e parë u mbyll pa gola, por me dy kartonë të verdhë e raste të shpërdoruara.

Në fraksionin e dytë gjërat ndryshuan, me Partizanin që e nisi më mirë, duke gjetur dhe golin e avantazhit. Da Silva u ballafaqua me Bekaj, duke e mposhtur këtë të fundit dhe regjistruar rezultatin 1-0.

Në vijim bardheblutë shtuan forcën sulmuese dhe u shfaqën më kërkues, por goli i baraspeshës do të vinte nga Deliu që realizoi një supergol nga distanca. Në minutat në vijim nuk mungoi as nervozizmi, por sfida u përmbyll 1-1.

Tirana udhëheq Superligën Shqiptare me 60 pikë, dy më tepër se Partizani i cili është dhe ndjekësi më i afërt. Në përballjet e tjera, Kastrioti i vendit të fundit mposhti Egnatian, Bylis fitoi ndaj Erzenit, Kukësi triumfoi 3-0 ndaj Teutës, teksa Vllaznia u rikthye tek fitorja, duke vazhduar luftën për Evropën.

LEXONI GJITHASHTU:

• Përleshje mes tifozëve pas derbit Tirana-Partizani, disa të lënduar
• Derbi Italisë për finalen e Champions, Interi synon të thyejë tabunë