Tentoi të korruptonte policët me 50 euro, e ‘pëson’ i riu në Kakavijë

Një 30-vjeçar është proceduar penalisht në Pikën Kufitare të Kakavijës, pasi tentoi të korruptonte punonjësit e policisë, për të kaluar në mënyrë të parregullt kufirin.

30-vjeçari ishte deportuar nga territori grek dhe tentoi të hynte sërish aty përmes pikës kufitare duke tentuar të korruptonte punonjësit e policisë.

Shërbimet e Policisë Kufitare, në dalje të Republikës së Shqipërisë, i kanë kërkuar shtetasit S. D., pasaportën, me qëllim kryerjen e procedurës së regjistrimit. 30-vjeçari ka dorëzuar pasaportën me një kartmonedhë 50 euro në brendësi të saj, me qëllim korruptimin e punonjësit të Policisë Kufitare, që ta lejonte të kalonte kufirin në mënyrë të parregullt.

Policia nisi procedimin penal në gjendje të lirë për këtë shtetas, ndërkohë që materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.

“Në vijim të veprimeve procedurale për këtë rast, specialistët për Hetimin e Krimeve Ekonomiko-Financiare të Drejtorisë Vendore të Policisë Gjirokastër referuan materialet në Prokurori dhe nisi procedimi në gjendje të lirë për shtetasin S. D., 30 vjeç, banues në Kuçovë, për veprën penale “Korrupsioni aktiv i personave që ushtrojnë funksione publike”, njofton policia.

LEXO GJITHASHTU:

• Merrte ryshfet, SPAK arreston oficerin e policisë në Elbasan
• Gjendet i mbytur në liqen 13-vjeçari në Dibër