Përballje shqiptaresh në Champions, Vllaznia ndeshet me kampionët e Kosovës

Mesditën e së premtes është hedhur shorti për raundin e parë kualifikues në Ligën e Kampionëve për femra.

Vllaznia, e cila regjistroi një tjetër sukses në Superligë ka njohur kundërshtaren e parë, e cila është kampionia e Kosovës. Shorti i hedhur në Nyon prodhoi përballje interesante, ku nuk mund të mungonte dhe një derbi shqiptaresh, si Vllaznia-Hajvalia.

Të dyja skuadrat bëjnë pjesë në grupin 7, ndërsa ekipi fitues do të përballet më tej me njërën mes Valur e Ankara Fomget. Përballja mes dy ekipeve shqiptare pritet me shumë interes, kjo për faktin se kanë pasur një ecuri të jashtëzakonshme në ligat respektive.

Kujtojmë se Vllaznia në sezonin e shkuar të Champions League pati një rrugëtim të mrekullueshëm, ku mbërriti deri në fazën e grupeve. Vajzat shkodrane u ndeshën me skuadra si PSG, Chelsea e Real Madrid. Vllaznia arriti të shënonte vetëm një gol në 6 përballjet e luajtura, pas një ekzekutimi të saktë nga goditja e dënimit të mesfushores Megi Doci.