Flamujt amerikanë mbushin bulevardin, punimet para ardhjes së Bill Klinton në Tiranë

Gazetarja e Euronews Albania, Raziela Myslimaj raportoi atmosferën këtë të hënë para mbërritjes së Bill Klinton në Tiranë.

Në pjesën ballore të kryeministrisë po vijojnë punimet për vendosjen e flamujve, podiumeve dhe gjithë dekoreve në nder të ish-presidentit amerikan.

Rruga është e mbushur plot me flamuj të SHBA-së, Shqipërisë dhe Bashkimit Europian.

Klinton është cilësuar si hero dhe miku më i mirë i shqiptarëve, gjë që e bën vizitën e tij shumë të rëndësishme për vendin.

Vizita historike e presidentit të 42-të i Shteteve të Bashkuara të Amerikës Bill Klinton do të nisë prej orës 19:00 të pasdites së datës 3 korrik.

Në agjendën e vizitës së Klinton në Shqipëri planifikohet që ai të mbërrijë në Tiranë në orën 19:00 dhe do të pritet nga Kryeministri Edi Rama në një ceremoni të posaçme zyrtare në Bulevardin “Dëshmorët e Kombit” përballë Kryeministrisë. Në ceremoni, është planifikuar që të ketë pjesëmarrje edhe të qytetarëve të Tiranës.

Pas ekzekutimit të himneve kombëtare të SHBA-ve dhe Shqipërisë, Kryeministri Edi Rama dhe Presidenti i 42-të i SHBA-ve Bill Klinton do të bëjnë parakalimin ceremonial dhe do të nderojnë flamujt e dy vendeve.

Në orën 19:05 Kryeministri Edi Rama do të mbajë fjalën e rastit dhe më pas do të ftojë zotin Bill Klinton të marrë çmimin e akorduar.

Në orën 19:25 do të zhvillohet ceremonia e nderimit të Presidentit të 42 të SHBA-ve Bill Klinton me “Yllin e Mirënjohjes për Arritjet Publike” që do të pasohet nga fjalimi i Presidentit.

Kjo është vizita e parë historike e ish-presidentit Bill Klinton, një nga më të dashurit dhe më të njohurit për shqiptarët për rolin tejet të rëndësishëm që ai pati në çlirimin e Kosovës në vitin 1999.

LEXONI GJITHASHTU:

• Balla: Vizita e Clinton në Tiranë historike, opozita të respektojë ftesën e Ramës
• Motomjeti përplaset me autobusin në Tiranë, dëmtohet 12-vjeçari