“Të merret një masë sigurie”, avokati: Mos ikën dhe Mediu si Llalla e Ahmetaj

Avokati i familjarëve të Gërdecit, Dorjan Matlija dha një deklaratë të shkurtër për mediat pas përfundimit të seancës së radhës kundër ish-ministrit të Mbrojtjes, Fatmir Mediu.

Sipas tij ka tentativa të vazhdueshme për të shtyrë procesin. Në këto kushte, Matlija tha se duhet konsideruar marrja e një mase sigurie në rast se Mediu vendos të largohet si Llalla apo Ahmetaj.

“Pavarësisht përpjekjeve, disa prej tentativave edhe funksionojnë herë pas here, siç u tha kemi shtyre deri më datë 8 shtator. I vetmi merak që kanë tani familjarët e viktimave dhe gjithë të dëmtuarve të tjerë të shpërthimit është se mos ndoshta ndodh e njëjta situatë, siç ndodhi që Llalla iku, Ahmetaj iku. Ndoshta është rasti që Prokuroria e Posaçme të konsiderojë një masë sigurie për çdo rast sepse një proces i tejzgjatur ka rreziqet e veta brenda,” – u shpreh Matlija.

Fatmir Mediu, përmes avokatëve të tij ka hequr dorë nga gjykimi i shkurtuar. Kjo i hap rrugë zgjatjes së procesit.

Avokatët kanë bërë me dije se në gjykimin e zakonshëm do të kërkojnë ekspertizë të re për shkaqet e shpërthimit, ndërsa do të pyesin dhe dëshmitarë që nuk janë  pyetur më herët.

LEXONI GJITHASHTU:

• “Gërdeci“, avokati i Mediut: S’kemi besim te gjykimi i shkurtuar, do sjellim prova
• Shtyhet gjyqi për Mediun, seanca e radhës në shtator