Pas mbledhjes së Këshillit reagon Indrit Sefa: Deklaratat e Bardhit janë qesharake

Sekretari ligjor i Partisë Demokratike Indrit Sefa ka reaguar lidhur me deklaratat e dhëna nga Gazment Bardhi pas përfundimit të mbledhjes së Këshillit Kombëtar të Partisë Demokratike.

Sefa ka thënë se deklaratat e sekretarit të përgjithshëm janë qesharake pasi sipas tij, Bardhi ka ngarkuar dhe shkarkuar institucionet pasi ka përfunduar një takim imagjinar.

Gjithashtu Sefa e ka ironizuar Gazment Bardhin për realizimin e mbledhjes në mënyrë online, dhe ka thënë se i uron suksese atij në krijimin e partisë së parë digjitale në vend.

“Nuk ka gjë më qesharake se deklarata e sotme e Gazment Bardhit që ngarkon dhe shkarkon institucionet e PD, përfshirë dhe kryesinë, pasi përfundon një takim imagjinar.

Çdo demokrat ndihet sot i turpëruar për këtë keqpërdorje të radhës që Sali Berisha po i bën deputetëve të PD për interesat e tij personale. Hallet e Sali Berishës nuk janë hallet e demokratëve. Dhe të gjithë ata që i shërbejnë qëllimeve të tij e kanë të shkruar fatin e tyre në 3 dekadat e pluralizmit shqiptar.

I urojmë zotit Bardhi suksese për krijimin e partisë së parë digjitale në vend. Është një hap inovativ që duhet përshëndetur.

PD nga ana e saj do të vijoje normalisht procesin e reformimit të saj dhe të zgjedhjes së kryetarit në datën 29 korrik.

Vetëm kështu mund ti shërbejmë qëllimit të demokratëve në përballjen me regjimin e Edi Rames”,-shkruan Indrit Sefa.

LEXONI GJITHASHTU:

• Portet ukrainase nën sulm, Zelensky viziton Odesën: Mburoja ajrore përreth qyteteve
• “Ajo ç’ka bëri Bardhi është një budallallëk”-analiza e Zekthit për zgjedhjet në PD