Të shpallur në kërkim ndërkombëtar nga Italia e SHBA, arrestohen 3 persona në Tiranë

Tre persona të cilët ishin shpallur në kërkim ndërkombëtar nga Italia dhe SHBA janë arrestuar ditën e sotme në Tiranë.

Policia bën me dije se në pranga ka rënë Alesandro Locateli, dhe shtetasi Stefano Bottura të cilët kërkoheshin nga Italia dhe Elton Daka i shpallur në kërkim ndërkombëtar nga SHBA.

Mësohet Alesandro Locateli ishte shpallur në kërkim ndërkombëtar pasi Gjykata e Apelit Tiranë e ka dënuar me 7 vjet burgim, për veprën penale “Pastrimi i produkteve të veprës penale ose veprimtarisë kriminale”, kryer në bashkëpunim.

Në vitin 2010, Locateli ka kryer dy transferta nga Sllovenia në Shqipëri, në shumën 500 000 euro, të cilat e kanë burimin nga veprimtaria kriminale e këtij shetasi, në shtetin italian.

Shtetasi Stefano Bottura ishte shpallur në kërkim ndërkombëtar pasi Gjykata e Rrethit Gjyqësor Tiranë e ka dënuar me 9 vjet burgim, për veprën penale “Mashtrimi kompjuterik”.

Ky i fundit me anë të një skeme mashtrimi, ka krijuar në Shqipëri një kompani në të cilën ka kryer disa transanksione, ku shuma e parave të hedhura në karta, ka qenë më e madhe se shuma e blerjeve të kryera.

Elton Daka ishte shpallur në kërkim ndërkombëtar pasi Gjykata e Rrethit Gjyqësor Fier e ka dënuar me 6 vjet burgim, për veprën penale “Mashtrimi”.

Ky shtetas, duke ushtruar profesionin e tij si avokat, në vitin 2013, ka mashtruar dy shtetas të përfshirë në një aksident, të cilëve iu ka marrë vlera të konsiderueshme parash dhe nuk ua ka zgjidhur çështjen.

Vijojnë procedurat për ekstradimin e këtyre shtetasve drejt vendit tonë.

 LEXONI GJITHASHTU: 

• Dita Botërore e Rinisë, pelegrinët mblidhen në Lisbonë në pritje të Papa Françeskut
• E trishtë| Futbolli në zi, ndërron jetë futbollisti i njohur i Lushnjës