“1 orë shkëmbim zjarri”, policia informacion zyrtar për ekzekutimin e 62-vjeçarit

Policia e Korçë ka dhënë informacion zyrtar lidhur me ekzekutimin e Ramiz Muçollarit nga RENEA paraditen e së shtunës në banesën e tij në fshatin Qesarakë, Maliq.

Sipas policisë, mes 62-vjeçarit, që nuk pranonte të dorëzohej, dhe efektivëve ka pasur rreth një orë shkëmbim zjarri.

“Shtetasi Ramiz Muçollari, pas plagosjes së dyfishtë u mbyll në banesë dhe nuk i’u përgjigj thirrjes së Policisë Vendore për t’u dorëzuar, por ka qëlluar me armë zjarri (mitraloz të lehtë) në drejtim të tyre.

Ndodhur në këto kushte janë dërguar me urgjencë në vendngjarje, Forcat Speciale “Renea”, të cilat kanë marrë nën kontroll perimetrin e afërt të sigurisë, ndërsa policia lokale është pozicionuar në perimetrin e largët të sigurisë.

Përgjatë natës, Forcat  Speciale “Renea”, i kanë bërë thirrje të pandërprera për t’u dorëzuar, por 62-vjeçari nuk i është bindur thirrjeve të Policisë për t’u dorëzuar dhe ka vijuar të qëllojë me armë zjarri drejt Policisë.

Në mëngjesin e sotëm, Forcat Speciale “Renea”, kanë mundur të hyjnë deri në katin e dytë të banesës së shtetasit Ramiz Muçollari, i cili ishte ngjitur në papafingon e banesës dhe ka hapur zjarr në drejtim të Forcave Speciale “Renea”, duke rrezikuar seriozisht jetën e tyre.

Forcat Speciale “Renea”, në zbatim të plotë të procedurave standarte janë kundërpërgjigjur me zjarr dhe përreth një orë ka vijuar shkëmbimi i zjarrit. Si pasojë e shkëmbimit të zjarrit, 62- vjeçari ka humbur jetën”, sqaron policia.

LEXONI GJITHASHTU:

• E rëndë në Maliq, burri kërkon të vrasë gruan dhe djalin, qëllon policinë
• “Probleme me të birin, luante bixhoz e pinte drogë”, – Flasin fqinjët e 62-vjeçarit