Transportonte 15 emigrantë të paligjshëm kundrejt pagesës, arrestohet 53-vjeçari

Një 53-vjeçar është arrestuar nga policia e Korçës pasi u kap duke transportuar 15 emigrantë të paligjshëm.

Në pranga u vu shtetasi P. G., 53 vjeç, banues në Pogradec.

“Shërbimet e Policisë, në bazë të informacioneve të siguruara nga inteligjenca informative, për një shtetas që do të transportonte kundrejt pagesës, shtetas të huaj, me qëllim që ata të kalonin ilegalisht kufirin, organizuan veprimet dhe në aksin rrugor “Qafë Plloçë-Pogradec”, bënë të mundur lokalizimin e automjetit të dyshuar. Shtetasi P. G., sapo ka konstatuar se ishte në ndjekje nga Policia, ka tentuar të largohet me shpejtësi me automjet, duke mos iu bindur urdhrit të punonjësve të Policisë, për të ndaluar, por menjëherë është kapur dhe neutralizuar. Gjatë kontrollit në automjetin tip “Rexton”, u gjetën 15 emigrantë. Nga tërësia e veprimeve hetimore dhe provat e siguruara, rezultoi se 53-vjeçari do t’i transportonte emigrantët, kundrejt pagesës, me qëllim që të kalonin në mënyrë të paligjshme drejt vendeve të BE-së”, bëri me dije policia.

Në cilësinë e provës materiale u sekuestruan automjeti, 2 celularë dhe një shumë parash.

LEXONI GJITHASHTU:

• Shkaktoi aksident pasi drejtonte makinën i dehur, arrestohet në flagrancë 30-vjeçari
• 15-vjeçari humb jetën duke punuar në lavazh, arrestohet pronari i biznesit