Dogji mbeturinat, por i vuri flakën tokave me të mbjella. Arrestohet fermeri (Emri)

Shtetasi Hasan Habili është arrestuar nga policia e Kavajës, për djegien e një sipërfaqe toke me të mbjella në fshatin Shtordhë.

Habili kishte ndezur zjarr në tokën në pronësi të tij, për djegien e disa mbeturinave, dhe për shkak të përhapjes së flakëve, janë djegur disa sipërfaqe toke të mbjella, në pronësi të tij dhe të një shtetasi tjetër.

Policia njofton se arrestimi i tij u bë në flagrancë pas mbërritjes së efektivëve në vendin e raportuar se ishte përfshirë nga zjarri.

“Sapo u njoftuan për një vatër zjarri, në fshatin Shtordhë, Kavajë, shërbimet e Komisariatit të Policisë Kavajë kanë shkuar menjëherë në vendngjarje dhe kanë bërë të mundur kapjen në flagrancë dhe arrestimin e autorit të dyshuar të këtij rasti, shtetasit H. H., banues në këtë fshat

Drejtoria Vendore e Policisë Durrës apelon për qytetarët që në asnjë rast të mos ndezin zjarre, pasi ky veprim përbën krim dhe ndëshkohet penalisht. Gjithashtu, i fton ata që të denoncojnë në numrin 112, çdo rast të tillë, me qëllim ndërhyrjen e menjëhershme për shuarjen e flakëve dhe për procedimin penal të shtetasve përgjegjës”, njofton policia.