Pranohet gjykimi i zakonshëm për Mediun, avokati i familjarëve: Jemi dakord

Avokati i familjarëve të Gërdecit, Dorjan Matlija tha në një deklaratë për mediat pas përfundimit të seancës së kësaj të premteje për ish-ministrin e Mbrojtjes Fatmir Mediu, se gjykata pranoi gjykimin e zakonshëm për të.

Matlija deklaroi se ishin dakord me këtë vendim.

“Në këtë seancë u pranua kërkesa e të pandehurit për të kaluar në ritin e gjykimit të zakonshëm, pra gjykata e pranoi si të drejtë kërkesën që i pandehuri ka gjithmonë të drejtë të heqë dorë,” – konfirmoi ai.

Ndërkohë avokati komentoi se 90 dëshmitarët që janë thirrur nga mbrojtja e Mediut.

“Lëvizja e sotme e zotit Mediu përmes mbrojtësve të tij ishte për të justifikuar kërkesën për të bërë gjykim të zakonshëm. Gjatë gjykimit të zakonshëm çdo gjë mund të bëhet nga e para. Në listën e dëshmitarëve dëgjova emra që kanë qenë në proces dhe të tjerë që nuk kanë qenë. Të gjithë personat që nuk kanë qenë në proces, në dijeninë time kanë lidhje vetëm me faktin se përse duhet ta bënte demontimin Shqipëria, por jo se si do ta bënte demontimin Shqipëria, Gjyqi nuk është pse ka demontuar armë ministria e Mbrojtjes në kohën kur ishte Fatmir Mediu ministër, gjyqi bëhet si është bërë ky demontim, kush i dha urdhrat për t’u bërë ku, si, nga kush, me çfarë teknologjia dhe nën mbikëqyrjen e kujt,” – u shpreh Matlija.

LEXONI GJITHASHTU:

• Nga Majko e Kodheli te zyrtarët e Pentagonit, ja dëshmitarët e thirrur nga Mediu
• Mbahet sot seanca gjyqësore për Fatmir Mediun, ish-ministri nuk është i pranishëm