Shkolla me 4 nxënës në Devoll, vetëm 2 prej tyre e frekuentojnë

Disa vite më parë shkolla e ciklit fillor në fshatin Kapshticë, Devoll numëronte rreth 60 nxënës nga fshati i cili ndodhet vetëm pak kilometra larg qytetit të Bilishtit.

Plaga më e madhe është emigracioni drejt shtetit fqinj, Greqisë, që si pasojë ka sjellë shpopullimin. Në këtë mënyrë, numri i nxënësve në shkollë ka rënë, duke ardhur në vitin 2023, ku ekziston vetëm një klasë me 4 nxënës.

E si të mos mjaftonte kjo, 2 prej tyre nuk janë paraqitur për të zhvilluar mësim.

“Unë jam 8 vjeç, quhem Leandra. Jam në klasën e tretë, 4 fëmijë jemi këtu në shkollë. Do doja të ishin më shumë. Lënda ime e preferuar është gjuha,” – tha një nga vajzat që shkon në këtë shkollë.

“Unë jam Avziu, jam 10 vjeç, në klasën e pestë. Me pëlqen shkolla. Ne 4 fëmijë jemi këtu po do më pëlqente të ishim më shumë,” – tregoi një djalë, nxënësi i dytë që frekuenton.

Setali Mane, ish-mësues tregon se para 15 vitesh shkolla e Kapshticës ka pasur 4 klasa me nga 15 nxënës.

Ai tregon edhe faktorët që kanë ndikuar në uljen e numrit të nxënësve në këtë shkollë.

“Ishim 4 klasa me nga 15 nxënës para 15 viteve. Pas saj nisi emigracioni njerëzit lëvizën dhe ikën e numri i nxënësve ra. Plus numri i lindjeve janë të pakta dhe arriti që para 5-6 vitesh numri vajti 7-8-10 fëmijë e fëmijët e kopshtit. Fshati ka kaluar mbi 50% që shtëpitë janë të mbyllura,” – u shpreh Mane.

Edhe ata pak banorë që kanë mbetur ngrenë shqetësimin e shpopullimit të fshatit.

“Këtu si mos më keq, ka 4-5 fëmijë, dy mësuese i bashkojnë në një klasë, sepse s’ka fëmijë. Emigrantët kanë ikur në Greqi, këtë e kanë lënë pas dore, interesi është fare minimal. Fshati është i boshatisur, shtëpi pa njerëz,” – tha një banor.

“Aktualisht nuk është mirë. Ku shkollat e para e ku kjo shkollë. Me vjen keq, mbesën e madhe e çoj Bilisht me lek, paguajmë se nuk ishin mundësitë këtu, në këtë shkollë nuk e merr të njëjtën edukate si e merr këtu ndërsa e vogla vjen këtu,” – u shpreh një tjetër.

Në qarkun e Korçës janë mbyllur 3 shkolla për këtë vit të ri shkollor, të treja në zona malore aty ku numri i banorëve për shkak të emigrimit ka ardhur në rënie e për rrjedhojë e numri i nxënësve është më i pakët.

LEXONI GJITHASHTU:

• Mësim në oborr, konflikti për pronësinë privat-bashki lë nxënësit pa shkollë
• Çantat e shkollës dëmtojnë shtyllën kurrizore, ortopedët: Shmangni peshat e rënda