Problematikat BE-Kinë, Brukseli dhe Pekini përplasje për tregtinë e automjeteve

Shqetësimet e biznesmenëve evropianë lidhur me marrëdhëniet dypalëshe tregtare me Kinën janë shfaqur sërish. Një raport i Dhomës Evropiane në Kinë thotë se rregullat e reja për sigurinë kombëtare të Pekinit po pengojnë kompanitë e huaja të veprojnë atje. Në një takim me delegatët kinezë, përfaqësuesit e Dhomës Evropiane u ankuan për qasjen e autoriteteve.

“Nuk mund të zgjidhen dy rrugë. Nga njëra anë fokusimi në masat e sigurisë kombëtare, me regjimet rregullatore që forcohen për të ulur vartësinë, gjë që shkon në dëm të kompanive të huaja; dhe nga ana tjetër zotim për reforma dhe hapje të tregut. Pyetja jonë është çfarë lloj marrëdhënieje është kjo?”, thotë Jens Eskelund, president i Dhomës Evropiane.

Shqetësimet u ngritën edhe nga komisionerja e BE-së për Digjitalizimin, Vera Jourova, në një takim të zhvilluar së fundmi në kryeqytetin kinez.

Tensionet janë rritur edhe nga nisja nga Bashkimi Evropian e një hetimi mbi shitjen e automjeteve elektrike kineze në Evropë, me Pekinin që mohon akuzat për praktika të pandershme.

“Masat e marra nga BE shkelin parimet e ekonomisë së tregut dhe rregullat e tregtisë ndërkombëtare. Ato nuk ndikojnë në stabilitetin e zinxhirit global të furnizimit në industrinë e automjeteve nuk janë në interes të askujt, as të vetë BE-së. Unioni duhet të dëgjojë me kujdes zërat e industrisë dhe të ofrojë një treg të drejtë, jo diskriminues dhe të parashikueshëm për kompanitë e huaja”, shprehet Mao Ning, zëdhënëse e Ministrisë së Jashtme kineze.

Të dyja palët deklarojnë se duan të vendosin marrëdhënie tregtare të barabarta dhe mirëbesimi, por rrjedha e biznesit përballë qasjeve të kontestuara po rezulton një sfidë më vete.

LEXONI GJITHASHTU:

• Me makinën plot me emigrantë nga Nepali, arrestohet 24-vjeçari
• BE ndëshkon gjigandin kinez, 345 mln euro gjobë për ‘TikToK’