Vrasja e policit në Kosovë, Basha: Beogradi të distancohet nga ngjarja e rëndë

Kryetari i Partisë Demokratike, Lulzim Basha ka reaguar pas ngjarjes së rëndë në veri të Kosovës, ku një polic humbi jetën dhe një tjetër u plagos pasi u sulmuan nga persona të maskuar dhe të armatosur.

Përmes një statusi në faqen e vet në Facebook, Basha shprehet se është i tronditur nga ajo çfarë ka ndodhur, ndërsa i bën thirrje Beogradit që të dënojnë dhe të distancohen nga kjo ngjarje e rëndë.

“I tronditur nga vrasja e punonjësit të Policisë së Kosovës dhe plagosja e një tjetër punonjësi ne Leposaviq. Mendimet dhe lutjet e mija janë me familjarët dhe kolegët e punonjësit që humbi jetën në krye të detyrës si dhe për daljen nga rreziku e shërimin e kolegut të tij të plagosur. Në këtë çast kritik të betejës kundër krimit jemi në krah të punonjësve të Policisë së Kosovës dhe autoriteteve të vendit teksa punojnë për vënien e autorëve të kësaj ngjarje të rëndë para ligjit. Ju bëj thirrje autoriteteve të Beogradit të dënojnë dhe të distancohen prerazi nga kjo ngjarje e rëndë dhe nga gjuha e aktet destabilizuese”, shprehet Basha.

LEXONI GJITHASHTU:

• Sulmohet polica në Veri të Kosovës, vritet një efektiv, plagoset një tjetër
• Granata dore e armë zjarri, detaje nga sulmi në Veri ku mbeti i vrarë 1 polic