Voton kandidati i “Bashkë Fitojmë” për Kukësin: Do raportojmë çdo parregullsi

Rreth 46 mijë qytetarë të Bashkisë së Kukësit kanë nisur t’i drejtohen kutive të votimit ditën e sotme për të zgjedhur drejtuesin e ri lokal, pas shkarkimit të Safet Gjicit, i përfshirë në një skandal seksual.

Kutitë e votimit u hapën në orën 07:00 të mëngjesit, teksa procesi i votimit pritet të mbyllet rreth orës 19:00.

Pas kandidatit të PS për bashkinë Kukës Albert Halilajt, edhe kandidati i koalicionit ‘Bashkë Fitojmë’, Emri Vata i është drejtuar kutisë së votimit për të hedhur votën e tij.

Në një prononcim të shkurtër për mediat pas votimit, Vata iu bëri thirrje kuksianëve të dalin të votojnë, ndërsa theksoi nga kampi i opozitës do raportohet çdo parregullsi dhe tentativë për të ndikuar zgjedhësit.

“Sot është një ditë e shënuar, një ditë e shenjtë për Kukësin dhe për të ardhmen e tij. I ftoj të gjithë banorët t’i drejtohen masivisht kutive të shprehin vullnetin e tyre të lirë dhe në mënyrë demokratike. Deri tani kemi evidentuar çdo lloj problematike që tentohet për të derformuar vullnetin, të cilat do paraqiten pasi të dokumentohen.

Gazetari i Euronews Albania, Ardit Hoxha raportoi nga Kukësit se pjesëmarrja në total në të gjithë bashkinë raportohet për një pjesëmarrje më të ulët në krahasim me zgjedhjet e 14 majit.

Kështu, nëse deri në orën 10:00 në zgjedhjet e 14 majit kishin votuar 9, 95 për qind e zgjedhësve, në të njëjtën orë në zgjedhjet e sotme raportohet se kanë votuar 8, 33 për qind e tyre.

LEXONI GJITHASHTU:

• Voton kandidati i PS në Kukës: Ishte fushata më e mirë
• Nis procesi i votimit në Kukës, 46 mijë qytetarë do të zgjedhin kryebashkiakun