“Nuk di si do jetojë pa ty”, vajza e policit të vrarë në Kosovë rrëqeth me fjalët

Vajza e policit Afrim Bunjaku, Arbenita, ka prekur me fjalim e saj në mbledhjen përkujtimore të babait, i cili u shpall “Hero i Kombit”.

Në fjalën e saj ajo theksoi se vendin e babait s’do e zërë dhe se e tërë Kosova do ta kujtojë me dhimbje dhe me mall.

“Heroi im, babai im, sa vështirë e kam të shkruaj për ty babai im, para kohës mbeta jetim, kurrë se kam besuar. Ikja jote na la një plagë të madhe në zemër. Babi nuk e di si do të jetoj pa ty. Hyra brenda në shtëpi dhe ty nuk të pashë, e rëndë për mua, vendin tënd në shtëpi nuk e zëvendëson askush. Të gjitha na e besove, por si të jetojmë pa ty asnjëherë. U flijove për këtë vend që ne dhe Kosova që të jemi krenar për heroizmin tënd. Do të jemi krenar për ty, me mall dhe me dhimbje do të kujtojmë”, u shpreh Arbenita.

Sot në Kosovë është ditë zie në nderim të policit Afrim Bunjaku, i cili mbeti i vrarë një ditë më parë në veri të Mitrovicës pas një sulmi me armë zjarri nga një grup terroristësh. Po ashtu, të plagosur mbeten edhe dy policë të tjerë, ndërsa u vranë dhe 4 sulmues.

Bunjakut do t’i jepet lamtumira e fundit pasditen e sotme në ora 16:00 në fshatin e tij të lindjes, në Samadrexhë të Vushtrrisë.

LEXONI GJITHASHTU: 

• Sulmi në veri, gjendet i vdekur edhe sulmuesi i katërt
• Situata në veri të Kosovës, reagon për herë të parë Moska