Përfundon autopsia e serbëve të vrarë në Banjskë, familjarët tërheqin trupat

Në Institutin për Mjekësisë Ligjore në Prishtinë është bërë autopsia e trupave të tre serbëve të vrarë në sulmin e armatosur ndaj policisë së Kosovës më 24 shtator në Banjskë afër Zveçanit, shkruajnë mediat serbe.

“Ajo që mund të them është se autopsia ka përfunduar. Identifikimi është çështje e prokurorisë. Raportet ende nuk janë kompletuar”, tha drejtori i Institutit të Mjekësisë Ligjore, Ditor Haliti.

Familjet e serbëve të vrarë raportohet se i tërhoqën trupat e të afërmve të tyre në orën 14:00.

Policia e Kosovës ka qenë e vendosur afër vendit ku janë dorëzuar trupat.

Në 24 shtator në Banjskë, një grup serbësh të armatosur rëndë të drejtuar nga nënkryetari i Listës Serbe, Milan Radoiçiç sulmuan policinë e Kosovës duke lënë të vrarë policin Afrim Bunjaku.

Grupi i serbëve u ngujuan në manastirin e Banjskës, nga ku për disa orë vijuan të qëllojnë ndaj policisë së Kosovës. Gjatë shkëmbimit të zjarrit mbetën të vrarë tre shtetas serbë.

LEXONI GJITHASHTU:

• Ben Blushi: Në manastrin e Banjskës, në Kosovë
• Familjarët kërkojnë të marrin trupat e pajetë të sulmuesve në Banjskë