Përplasja Rama-Kurti, Basha: Interesi kombëtar prioritet, fund protagonizmi personal

Kreu i Partisë Demokratike në një intervistë ekskluzive për Euronews Albania, ka folur në lidhje me sulmin në Veri të Kosovës një javë më parë, ku një polic kosovar mbeti i vrarë dhe tre sulmues.

Basha tha se interesi kombëtar duhet të jetë prioritar, kur u pyet në lidhje për marrëdhënien mes kreut të qeverisë Edi Rama dhe homologut të tij kosovar Albin Kurti.

Kryedemokrati theksoi se Kosova ka nevojë për ndihmën e Shqipërisë dhe se duhet të lihet mënjanë protagonizmi personal, referuar këtu kundërshtarit të tij politik, Rama.

“Shqipëria të jetë në dispozicion të Kosovës për t’i ofruar  gjithçka që Kosova ka nevojë  në çdo fushë që e kërkon, dhe të mos bëjë asgjë pa koordinim me Kosovën. Protagonizmi i tepërt, në veçanti në ambientet ndërkombëtare e ka dëmtuar Kosovën. Ndaj duhet t’i jepet fund protagonizmit personal. Kosova ka nevojë për ndihmën e Shqipërisë dhe nuk duhet të përdoret si mollë sherri për betejat e brendshme politike në Tiranë. PD do të bëjë gjithçka për të qenë në mbrojte të Kosovës. Por po kështu t’i njohim vetes një sens vetëpërmbajtje që mos ta shndërrojmë Kosovën në një çështje të përplasjeve të brendshme politike në Tiranë.

Interesi  Kombëtar i Shqipërisë dhe i Kosovës është një dhe i pandarë, dhe në funksion të këtij interesi kombëtar, dhe në funksion të këtij interesi kombëtar çdo aktor duhet të lënë mënjanë gjithçka që ju dikton kimia e tyre personale, edhe kur është pozitive e jo më kur kjo kimi lë për të dëshiruar”-tha Basha.

LEXONI GJITHASHTU: 

• “Interpelancë me Ramën”, Basha: Të sqarojë urgjentisht deklaratën për KFOR
• “Vuçiç i përfshirë në skenar”, Basha: Armatimi në Kosovë është futur prej muajsh