Basha uron studentët për nisjen e vitit akademik, mbështet bojkotin e Mjekësisë

Kryetarit i Partisë Demokratike, Lulzim Basha, ka uruar studentët në mbarë vendin për fillimin e vitit të ri akademik. Përmes një postimi në facebook, Basha shkruan se ky vit akademik nis me bojkotin e studentëve të mjekësisë, të cilët janë kundër ligjit për ndalimin e dhënies së diplomës.

Kreu i PD nënvizon se Shqipëria bëhet një vend më i mirë, jo duke ndëshkuar studentët, por duke u ofruar atyre mundësi punësimi dhe paga dinjitoze në mënyrë që të mos braktisin vendin.

“Sot në nisje të vitit të ri akademik i uroj studentëve dhe pedagogëve një vit të mbarë dhe të suksesshëm.

Në takime me studentë e pedagogë  jam njohur me probleme themelore të cilat përballen çdo ditë: mungesa e mbështetjes për mirëkualifikimin e stafit akademik, arsimim jo cilësor e bashkëkohor, mungesë të infrastrukturës fizike e dixhitale, tarifa studimi të larta, politika jo mbështetëse për karrierë e punësim.

Fatkeqësisht, ky vit akademik po nis me bojkot të mësimit nga studentët e Mjekësisë, të cilët me të drejtë kundërshtojnë ligjin anti-kushtetues dhe anti-demokratik të ndalimit të dhënies së diplomës së mjekut me kushtin e punësimit prej disa vitesh brenda vendit.

Studentët largohen nga vendi jo nga dëshira por sepse nuk kanë mundësi, nuk kanë kushte, nuk kanë punë e pagë dinjitoze për të ndërtuar një jetë të mirë në vend, largohen nga shpërfillja e një qeverie që nuk i dëgjon dhe nuk i ofron siguri për të nesërmen.

Shqipëria do të bëhet një vend më i mirë dhe dëshirueshëm për studentët dhe pedagogët jo duke ndëshkuar ata që kërkojnë të largohen për shkak të kushteve ku është katandisur arsimi universitar, por duke investuar në arsim dhe kërkim shkencor, duke rishikuar tarifat studimore, duke ofruar mbështetje konkrete për arsimimin dhe punësimin e studentëve me paga dinjitoze”, shkruan Basha.

LEXONI GJITHASHTU: 

• “Interpelancë me Ramën”, Basha: Të sqarojë urgjentisht deklaratën për KFOR
• “Vuçiç i përfshirë në skenar”, Basha: Armatimi në Kosovë është futur prej muajsh