Kompania “Fly Ernest” mbyll nesër fluturimet, pasagjerët që kanë prerë biletën do të rimbursohen

“Fly Ernest” do të anulojë të gjitha fluturimet duke nisur nga dita e nesërme. Menjëherë pas këtij vendimi Autoriteti i Aviacionit Civil u lidh me drejtuesit e kompanisë, të cilat siguruan se “Fly Ernest” do të rimbursonte biletat e blera nga udhëtarët.

“Sot, më datë 10 Janar 2020, AAC u informua, se Ernest do të kryente edhe 4 fluturime përgjatë ditës së shtunë të datës 11 Janar dhe 8 fluturime të tjera përgjatë të dielës më 12 Janar, me një avion me qira.

Por, në orën 16:00, Ernest na informon me një tjetër korrespondencë, AAC-në bashkë me autoritetin ukrainas, se i anulon të gjitha fluturimet nga nesër”- njoftoi ditën e djeshme në “Facebook” Autoriteti i Aviacionit Civil.

Të gjithë pasagjerët duhet të bëjnë aplikimin për rimbursim të çmimit të biletës tek faqja zyrtare e kompanisë.

“AAC rekomandon të gjithë pasagjerëve me bileta të prera me Ernest, të konfirmojnë dhe kontaktojnë kompaninë, aeroportin, agjencinë për statusin e fluturimit të tyre para se të nisen për në aeroport. Gjithashtu, të gjithë pasagjerët duhet të bëjnë aplikimin për rimbursim të çmimit të biletës tek faqja zyrtare e kompanisë”-thekson më tej AAC-ja.