Vuçiç për letrën e Biden: Nuk do të lejoj që të poshtërohet Serbia dhe dikush të marrë gjithçka

Kreu i shtetit serb Aleksandër Vuçiç ka reaguar pas publikimit të letrës ku kreu i ri i Shtëpisë së Bardhë Joe Biden i kërkonte njohjen e pavarësisë së Kosovës.

Vuçiç tha se sa i përket njohjes reciproke, nuk thuhet në asnjë akt të organizatave botërore. Sipas tij ka pasur përpjekje për ta përfshirë në marrëveshjet e ardhshme, duke nënkuptuar takimin e shtatorit me ish-presidentin Trump.

“Kam marrë një mesazh urimi nga Presidenti Biden. Sa i përket njohjes reciproke, nuk thuhet në asnjë akt të organizatave botërore.

Ka pasur përpjekje për të imponuar atë term si diçka që duhet ta kishim pranuar si zgjidhja përfundimtare. Por unë ua thashë çfarë mendoja për njohjen reciproke”- shprehet Vuçiç, raportojnë mediat serbe.

Interesit të medias për këtë ndryshim toni të qëndrimit nga Shtëpia e Bardhe për serbet, Vuçiç iu përgjigj: “Unë nuk do të lejoj që të poshtërohet Serbia dhe dikush të marrë gjithçka. Por, unë nuk do të gënjej popullin dhe të them se situata do të jetë e lehtë. Do të jetë gjithnjë e më e vështirë”.

Mediat serbe duke iu referuar letrës së Biden, nënvijëzuan se urime te tilla janë kryesisht protokollare, dhe është hera e parë që përcillet një mesazh i këtij lloji, ku kërkohet zgjidhje e çështjes së Kosovës përmes njohjes.

Në takimin e shtatorit të vitit të kaluar në Uashington, presidentit serb iu ofrua të përfshinte te marrëveshja edhe termin “njohje reciproke”, por Vuçiç e hodhi poshtë dhe ky term u hoq nga marrëveshja e Uashingtonit.