BB: Turizmi rriti ekonominë, tejkalohen parashikimet për rritjen ekonomike

Shqipëria theu pritshmëritë për progres në ekonomi. Sipas Banës Botërore, Shqipëria së bashku me Malin e Zi, ishin të vetmet në rajon për këtë vit që shënuan ndryshim pozitiv nga parashikimet e shënuara në raportin e mëparshëm mbi vrojtimin e ekonomisë së Ballkanit Perëndimor.

Merita kryesore institucioni i lartë financiar ja ka atribuuar bumit turistik që karakterizoi rajonin dhe në veçanti Shqipërinë, e cila shënoi rekord për vizitor të huaj.

Me 7.2 milionë turistë deri në muajin gusht në vendin tonë, ekonomia u rrit 0.8 pikë për qind krahasuar me parashikimet e raportit për vitin.

Gjithashtu, përmirësohet edhe punësimi, ku shkalla mesatare e punësimit për rajonin arriti në 48%, niveli më i lartë historik, me krijimin e 103.000 vendeve të reja pune nga mesi i 2022 dhe deri më tani. Por mungesa e forcës punëtore vijon të mbesë problem kryesor në ngadalësimin e performancës ekonomike të rajonit. Mungesa e forcës punëtore dhe dallimet e mëdha gjinore janë faktorët kryesor të cilat kufizojnë uljen e mëtejshme të varfërisë dhe duhen adresuar, shkruhet në raport.

Fokusi tjetër i veçantë në rekomandimet e institucionit ishte mbi përfshirjen e sigurimeve në bujqësi për t’i bërë ballë vështirësive të prodhimit, i cili u cenua nga shkurtimi i stinëve dhe thatësira e madhe që ka pushtuar rajonin. Sipas raportit, bujqësia e gjelbër ofron mundësi për rritjen e produktivitetit, konkurrencës dhe qëndrueshmërisë.

LEXONI GJITHASHTU:

• Pr.ligj i ri për turizmin: Luftë informalitetit, gjoba për “fshehjen” e vizitorëve
• “Turizmi do vihet nën kontroll”- Çfarë parashikon pr.ligji i ri i qeverisë