Oficerët e OPGJ hyjnë në pallatin ku ndodhet banesa e Berishës

Oficerët e Policisë Gjyqësore kanë hyrë pasditen e kësaj të hëne në pallatin e ish-kryeministrit Berisha.

Siç shihet dhe nga pamjet e siguruara nga Euronews Albania, 3 oficerët e OPGJ, dalin nga dera e pallatit të Berishës, pasi qëndruan aty për disa minuta.

Në foto shihet Hekuran Bregu, Shef i Sektori i Krimit Ekonomik, i shoqëruar nga pas dhe nga truprojat e kreut të Rithemelimit.

Ish-kryeministri Berisha hyri në ambientet e banesës rreth orës 3:20, ku përdori kalimin përmes parkimit, me qëllim që të shmangte dhe kontaktet me mediat.

Kujtojmë se në pallatin ku banon Berisha, gjenden dhe disa apartamente në pronësi të dhëndrit të ish-kryeministrit Jamarbër Malltezi.

Me urdhër të SPAK Malltezit i janë sekuestruar në total 25 pasuri, prona të paluajtshme si edhe 6 llogari bankare.

Oficerët e OPGJ-së u panë paraditen e kësaj të hëne dhe në vilën në Gjirin e Lalëzit në pronësi të dhëndrit të ish-kryeministrit.

Malltezi akuzohet nga Prokuroria e Posaçme për “Korrupsion pasiv” dhe “Pastrim parash” në lidhje me privatizimin e ish-kompleksit “Partizani”.

Për të njëjtën çështje GJKKO ka caktuar masat e sigurisë Detyrim paraqitje dhe për Sali Berishën dhe sipërmarrësin Fatmir Bektashi.

LEXONI GJITHASHTU:

• SPAK vë nën sekuestro vilën e Jamarbër Malltezit në Gjirin e Lalëzit
• Dosja/ Zbardhet biseda mes Berishës e Rulit: S’rri me atë borxh, letrat me vlerë…
• Prona, apartamente dhe vila në Lalëz, lista e pasurive të sekuestruara të Malltezit