Koçiu: Mbështesim të rinjtë për realizimin e pasioneve përmes kurseve

Ministrja e Shëndetësisë dhe Mbrojtjes Sociale, Albana Koçiu, ka zhvilluar një takim, në Shtëpinë e Fëmijës “Zyber Hallulli”, me fëmijë dhe të rinj të cilët po ndjekin kurse të ndryshme të formimit profesional.

“Sigurimi i jetesës së pavarur dhe dinjitoze, nëpërmjet marrjes së njohurive, edukumit të duhur dhe aftësimit të tyre për të ardhmen, është qëllimi ynë”- ka thënë ministrja Koçiu në krye të fjalës së saj.

Me synimin që e ardhmja  dhe zhvillimi i fëmijëve të jetë sa më i shëndetshëm, ministrja Koçiu ka theksuar se do të vijojë procesi i de-institucionalizimit që do të shërbejë për sigurinë e mirërritjes së tyre.

“Përmes arsimimit dhe formimit profesional forcohen marrëdhëniet shoqërore dhe familjare. Duke pasur një profesion ju mund të keni një punë të sigurt. E duke pasur një punë të sigurt mund të keni edhe të ardhura të qëndrueshme, që ju ndihmojnë në krijimin e një familjeje të shëndetshme. Duke mbështetur fëmijët e të rinjtë në institucionet tona me një përkujdesje të mirë shoqërore, bën që të gjithë të aftësohen për tregun e punës për një jetesë dinjitoze.” – ka thënë ministrja Koçiu.

Veç të tjerave, ngritja e modelit shtëpi-familje dhe qendrës rinore, siç u theksua, ka për qëllim jo vetëm të akomodojë sa më mirë fëmijët dhe të rinjtë, por edhe të zhvillojë potencialin e plotë të tyre, të ofrojë një mjedis të sigurt, familjar e mbështetës ku të rinjtë të inkurajohen për të ndjekur ëndrrat e tyre.

Në fund të këtij aktiviteti, Ministrja e Shëndetësisë dhe Mbrojtjes Sociale ka shpërndarë çertifikatat vlerësuese për të gjithë fëmijët dhe të rinjtë e pranishëm.

LEXONI GJITHASHTU: 

• Paralajmërimi i gazetarit: Berisha do të ketë dosje të tjera
• Hetimi ndaj Berishës, Topalli për Euronews: Ngjarje politike, nuk ka asnjë provë