Akrobatët nga Dibra e madhe dhurojnë spektakël në teatrin e Durrësit

Një mbrëmje plot magji dhe iluzione u zhvillua në teatrin e Durrësit.

Prindër, gjyshër e fëmijë ndoqën spektaklin e përgatitur nga akrobatët e cirkut “Colorado” të Dibrës së Madhe nga shqiptarët e Maqedonisë së Veriut.

Më të lumturit ishin të vegjlit, që për pak minuta mundën edhe të provonin “magjinë” e skenës.

Ndonëse salla u mbush plot gjatë 2 shfaqjeve njëra pas tjetrës, organizatori Bekim Ame dhe trupa e tij kërkojnë më tepër mbështetje.

“Ne vijmë me të gjitha shpenzimet, nuk kemi përkrahje, madje as nuk kemi kërkuar, sepse ia kemi dalë vetë. Ne duam vetëm të na mundësojnë që të bëjmë njoftime nëpër shkolla, sepse kanë nevojë fëmijët për argëtim,” – tha Ame.

Me magjistarë bullgarë e maqedonas pjesë të trupës, Ame apelon gjithashtu për një bashkim me profesionistë nga Shqipëria.

“Ne dëshirojmë që të kemi një bashkëpunim dhe me akrobatë të Shqipërisë, që dhe kjo trupë të jetë pjesë e cirkut të Maqedonisë së Veriut,” – u shpreh ai.

Këtë e pohojnë edhe vetë akrobatët.

“Është hera e dytë ose e tretë që vij në qytetin e Durrësit. Ky vend është shumë i bukur, e dua Shqipërinë. Pse jo, mos të kemi një grup të përbashkët? Kështu s’do të ketë kufinj, të paktën në art,” – tregoi magjistari Sashko Smillkov.

LEXONI GJITHASHTU:

• “Luftë, apo teatër me armë”, Ardian Shtuni: Prigozhin është Frankeshtajni i Putinit
• Tensionet në Veri, Milo: Teatër i madh politik! Kurti i pamatur, u paralajmërua