Medalje ari në boks, Shqipëria triumfon në kampionatin ballkanik

Shqipëria vijon të shkëlqejë në arenën ndërkombëtare duke grumbulluar të tjera medalje ari, teksa këtë herë ishte radha e dy vëllezërve nga kryeqyteti, Ahmed e Amar Koçi. Të rinjtë në fjalë kanë triumfuar në kampionatin ballkanik të boksit të zhvilluar në Rumani, ku kanë ngritur lart flamurin kuqezi. Një kompeticion ku merrnin pjesë dhjetra boksierë të talentuar, por ku padyshim kampione u shpall Shqipëria.

Krahas dy vëllezërve Koçi, sukses regjistroi dhe Besjan Karaj që u shpall nënkampion. Amari 17-vjeçar garoi në peshën 75 kg, ku në finale mposhti boksierin serb, ndërsa vëllai i tij Ahmedi, në finalen e peshës 70 kg fitoi ndaj sportistit vendës. Sa i përket peshës 71 kg, kuqezinjtë rrëmbyen medaljen e argjendit, ku dhe i riu tjetër Besjan Karaj ishte shumë pranë shpalljes kampion ballkani.

Kompeticioni ballkanik i boksit u mbajt në Rumani në datat 18-28 tetor. Kujtojmë se Euronews Albania, pak javë më parë zhvilloi një intervistë me boksierët në fjalë, nga ku premtuan medaljen e arit në kampionatin në fjalë, ndërsa arritën t’ ia dalin me sukses.