“Aksioni opozitar, halli i Berishës”, Mentor Kikia: Krizë që nuk zgjidhet tani

Gazetari Mentor Kikia komentoi në një intervistë për Euronews Albania deklaratën e Blendi Çuçit pas tensioneve në Kuvend, i cili tha se mazhoranca ishte e hapur për dialog vetëm për hallet e shqiptarëve dhe jo për pazare.

Sipas gazetarit, kjo situatë, referuar dhe deklaratave nga mazhoranca, tregon se tensionet në seancat parlamentare do të vijojnë.

“Padyshim që çdo seancë po shndërrohet thjesht në një deja vu. Jemi duke parë të njëjtat skena, të njëjtët aktorë, të njëjtat mënyra se si po përpiqet opozita të plotësojë kërkesat e saj dhe për herë të parë kemi një reagim të mazhorancës, pavarësisht se si, kjo është një tjetër çështje. Deri më parë, mazhoranca kishte zgjedhur thjesht ta neglizhonte situatën. Kjo është hera e parë që Partia Socialiste reagon përmes kryetarit të grupit parlamentar, por reagimi apo propozimi i zotit Çuçi nuk çon askund në një zgjidhje të kësaj situate, që pranohet ose jo, ka marrë përmasat e një krize politike, përderisa është bllokuar institucioni i ligjvënies apo po e shtrëngon atë të veprojë në kushte aspak normale duke miratuar ligje jashtë debatit, jashtë një seancë ku mund të diskutohet apo bëhen propozime, por duke bërë një proces që kalon krejtësisht formalisht.

Socialistët po përpiqen të mos e konsiderojnë një çështje që duhet zgjidhur, situatën e krijuar, por ta konsiderojnë një problem personal të Berishës. Unë mendoj që tani për tani i është mbyllur dera një mundësie për ta zgjidhur këtë krizë,” – u shpreh Kikia.

LEXONI GJITHASHTU:

• Marrëveshja për emigrantët, Balluku: S’është përfundimtare, do kalojë në Parlament
• Rezoluta për mbështetje financiare të policëve, Kuvendi i Kosovës nuk e miraton