11 urdhër arreste nga SPAK, Taulant Balla përgëzon policinë

Ministri i Brendshëm, Taulant Balla ka përgëzuar Policinë e Shtetit në organizimin e punës dhe finalizimin e operacionit të SPAK, nga i cili u lëshuan 11 urdhër arreste.

Ai u shpreh se drejtuesit dhe pjesëmarrësit e Policisë së Shtetit në këtë operacion treguan profesionalizëm të plotë dhe ruajtën deri në fund informacionin sensitiv.

Deklarata e plotë:

Gjej rastin t’i falenderoj dhe përgëzoj prokurorët për besimin dhe bashkëpunimin. Në rrjetën e këtij bashkëpunimi kanë rënë eksponentë të krimit të organizuar, zyrtarë dhe ish-zyrtarë të Policisë së Shtetit si dhe persona të tjerë bashkëpunëtorë me ta.

Ky operacion domethënës është konsolidimi i ngritjes në një nivel tjetër të vullnetit të agjencive tona ligjzbatuese për ta goditur krimin në të gjithë spektrin e tij, në funksion të rendit ligjor në të gjithë territorin.

Sot gjej rastin të rikonfirmoj besimin e plotë se forcimi i bashkëpunimit mes agjencive ligjzbatuese dhe lufta e përbashkët në vetë-pastrimin e Policisë së Shtetit, do ta çojë Shqipërinë në një tjetër nivel të sundimit të ligjit.

LEXONI GJITHASHTU:

• “Çdo ditë vigjilent”, Balla: Mbrojtja e fëmijëve nga dhuna seksuale, detyrë morale
• Balla takim me kryeministrin e Moldavisë: Gati 3 marrëveshje të rëndësishme