Shifrat mbeten të larta, 15 të vdekur nga Covid-19 në Shqipëri

Ministria e Shëndetësisë thotë se 15 pacientë të infektuar me Covid-19 kanë humbur jetën si dhe janë zbuluar 1021 raste të reja.

Këtë të martë është hapur pavioni i dedikuar COVID në Spitalin Rajonal të Elbasanit, duke u zgjeruar me 3 spitale rajonale trajtimi I pacientëve me COVID-19, përpos 4 spitaleve COVID në Tiranë. Në spitalet Covid po trajtohen 648 pacientë, 42 në terapi intensive, nga të cilët 15 pacientë janë të intubuar.

Shqipëria nga fillimi i pandemisë numëron 1 696 të vdekur dhe mbi 102 mijë të konfirmuar pozitivë. Qarku më i prekur nga coronavirus është Tirana, e cila kryeson si për numrin e vdekjeve ashtu dhe për të infektuarit.

Teksa vendi ka hyrë në muajin e 12-të të pandemisë së COVID-19, të dhënat zyrtare të përpunuara nga Euronews Albania tregojnë për dyfishim të rasteve me infeksion gjatë 30 ditëve të fundit.

Në periudhën dhjetor-janar autoritetet patën pikasur rreth 16,500 raste me infeksion, ndërsa gjatë muajit janar-shkurt u pikasën 31,000. Vihet re se gjatë kësaj periudhe autoritetet kanë pothuajse dyfishuar mesataren e testeve ditore – nga 2,300 në 4,100 – çka mund të justifikojë dhe këtë rritje.

Sidoqoftë shqetësues mbetet fakti se pozitiviteti ndër të testuarit për COVID-19 ka pësuar rritje nga 22.8% në periudhën dhjetor-janar në 24.2% në periudhën janar-shkurt.