“28 Nëntori na kujton çmimin e lartë të lirisë”, Vjosa Osmani homazhe Adem Jasharit

28 Nëntori, Dita e Pavarësisë së Shqipërisë, është gjithashtu edhe dita e lindjes së komandantit legjendar të Ushtrisë Çlirimtare të Kosovës Adem Jasharit, ndaj presidentja e Kosovës Vjosa Osmani i ka nisur ceremonitë me homazhe për komandantin.

Ajo ka qenë e pranishme në fshatin ku Adem Jashari lindi e ku gjenden varrezat e tij dhe të familjes së tij, të cilët sakrifikuan jetën për lirinë e Kosovës.

Homazhet u bën në kompleksin memorial të familjes së komandantit legjendar Adem Jashari ku u ngritën edhe dy flamujt, ai i Shqipërisë dhe i Kosovës.

Presidentja Vjosa Osmani mbajti fjalën e saj, ku uroi të gjithë shqiptarët për festën e pavarësisë ndërsa shprehu nderimin për familjen historike.

“Urime 28 Nëntori, dita e flamurit, të gjithë shqiptarëve kudo që janë, Këtë ditë historike e fillojmë duke nderuar një figurë dhe një familje po aq historike sa edhe vetë flamuri kuq e zi, familjen Jashari, duke shënuar edhe ditëlindjen e komandantit legjendar Adem Jasharit, si dhe daljen e parë publike të Ushtrisë sonë çlirimtare, më 28 Nëntor 1997.

Është flamuri kuq e zi dhe data 28 Nëntor ajo që na kujton ne çmimin e lartë të lirisë dhe njëkohësisht edhe sakrificat që janë bërë ndër shekuj në mënyrë që të gjithë të jetojmë të lirë.

Shqiptarët kudo që janë e shënojnë këtë ditë dhe është një moment reflektimi për gjithë atë që heronjtë tanë kanë bërë për Shqipërinë. Lavdi gjithë atyre që kanë dhënë gjithçka për lirinë e Shqipërisë dhe për lirinë e Kosovës, dhe respekt i jashtëzakonshëm për familjen Jashari”,-tha Vjosa Osmani.

LEXONI GJITHASHTU:

• “Flamuri, Pavarësia, Bashkimi, Liria”, Kurti uron nga Vlora shqiptarët
• Parashuta me flamurin kuq e zi ulet në Prekaz, pamjet nga festimet në Kosovë