”Rreth 23 mijë gjoba për maskat nuk janë shtuar në faturën e dritave”, Elton Sevrani tregon arsyet

Administratori i Furnizuesit të Shërbimit Universal në Tiranë, Elton Sevrani tregoi në Euronews Albania se shtimi i gjobës së COVID-19 në faturën e energjisë elektrike u vonua me 2 muaj për shkak se ishte një proces që kërkonte kohë.

“Duke qenë se kishim të bënim me një proces për të ndërhyrë në faturën e furnizimit me energji elektrikë, u detyruam në përputhje me rregullat e prokurimit publik, që të shtonim këtë zë. Kjo mori kohën e saj. Në muajin janar formati i faturës ka qenë i gatshëm duke përfshirë edhe zërin e gjobës COVID-19”, u shpreh ai.

Zoti Sevrani tha se deri më tani janë sjellë nga Policia pranë Furnizuesit të Shërbimit Universal 58 mijë e 500 gjoba.

Ai theksoi më tej se rreth 23 mijë gjoba janë kryer mbrapsht për shkak të probleme që kanë pasur me ID ose për shkak të mungesës së një kontrate me OSHEE-në.

“Në sistem janë hedhur 2 mijë gjoba. Deri më tani rreth 90-100 gjoba janë paguar”, u shpreh ai.

Ndërkohë të gjithë gjobat që kthehen nga OSHEE, duhet të paguhen në stacionet policore. 

Lexoni gjithashtu:

Afro 1.6 mln euro, nis ‘vjelja’ e gjobave për maska, OSHEE fillon faturimin