Gazetari nga Maqedonia e Veriut kundër dënimit me vdekje: Nxitet nga politika

Vrasja e 14-vjeçares Vanja Gjorçevska, ka tronditur opinionin publik në Maqedoninë e Veriut, aq më tepër kur u zbulua që pjesë e planit të rrëmbimit ishte dhe babai i saj.

Një peticion ka nisur të shpërndahet gjerësisht në rrjete sociale, ku qytetarët nënshkruajnë për rikthimin e dënimit me vdekje në Maqedoninë e Veriut.

Naser Selmani, gazetar nga RMV është shprehur kundër idesë për rikthimin e dënimit me vdekje. Në një intervistë për Euronews Albania ai tha se është politika në RMV që i fut në rrugë qorre qytetarët.

“Dënimi me vdekje po kërkohet jo vetëm për të dyshuarit e vrasjes së 14-vjecares por edhe për krime të tjera që mund të kenë ndodhur në RMV. Njerëzit nuk kanë njohurinë e duhur për të kuptuar se kjo nuk është mënyra e duhur se si duhet të reagojë shteti ndaj këtyre krimeve. Mendoj se politika i nxit në rrugë qorre që debati të mos mbërrijë atje ku duhet të mbërrijë. Ka pasur krime makabre në të kaluarën në RMV por ajo që është më e keqja është që këto krime nuk janë zbardhur deri në fund dhe njerëzit janë dënuar edhe në mungesë provash. Para disa vitesh u ekzekutuan 5 fëmijë në rrethinat e Shkupit dhe për këtë janë dënuar disa shqiptarë me dënime të përjetshme me akuzën që këtë krim e kanë bërë për ekstremizëm fetar. Ky dënim është bërë pa pasur provat e mjaftueshme”, tha gazetari.

LEXONI GJITHASHTU:

• Arrestohet Ljupço Pallço, akuzohet për vrasjen e 14-vjeçares dhe të moshuarit në RMV
• Avokati Arbër Hoxha: Nuk mund të rikthehet dënimi me vdekje për 3 arsye