Astrit Çela kujton 30-vjetorin e eksodit të shqiptarëve, çfarë ka ndryshuar për ta në Itali

Tridhjetë vite më parë, nga marsi deri në muajin gusht, dhjetëra mijëra shqiptarë u nisën drejt Italisë në përpjekje për t’iu larguar diktaturës komuniste, e cila po përjetonte ditët e fundit.  

Astrit Çela, president i shoqatës “Albania e futuro” komentoi për Euronews Albania domethënien e këtij 30-vjetori, ku në Brindizi shumica e atyre shqiptarëve që emigruan asokohe kanë arritur të integrohen plotësisht.

“Komuniteti i jonë sot është i shëndoshë, plotësisht i dobishëm jo vetëm për shtetin italian, por edhe në rrafshin Itali-Shqipëri,” – u shpreh Çela, tashmë familjar me një djalë 23 vjeç, i cili vazhdon universitetin.

“E përsëris herë-pas-here, që ajo anije ishte kurajoja, guximi drejt demokracisë dhe lirisë, dhe ai [djali i tij] duhet të jetë krenar për aventurën që ne morën përsipër,” – tregoi Çela ish-mësues i një shkolle tetëvjeçare të Skraparit.

“Filloi një vit para nesh, me eksodin në ambasada [2 korrik 1990], por ajo dyndja më e madhe ka qenë periudha e marsit 1991 ku një prej tyre kam qenë edhe unë,” – tha Çela teksa shtoi se ky përvjetor ka ngjallur vëmendje edhe për shtypin italian, i cili ka nxjerrë në pah ndryshimet që kanë ndodhur me kohën.

Çela rrëfeu se përpara emigrimit, ashtu si shumica e te rinjve, ishte edukuar prej televizionit me kulturën italiane aq sa “Italia te konsiderohej Amerika për Shqipërinë”.

Për sa i përket problematikave, pandemia mbetet kryesore, ku disa nga sipërmarrjet shqiptare në Itali janë prekur nga efektet e saj me dëme ekonomike. Megjithatë Çela tha se problemet kryesore janë tejkaluar.

Ai shtoi se duke qenë bashkë si komunitet edhe institucionet italiane priren të respektojnë më tepër.