Përplasje Bullgari-Maqedoni e Veriut për pakicat, analisti: Pjesë e folklorit parazgjedhor

Çështja e pakicës bullgare në Maqedoninë e Veriut ka përplasur krerët e dy shteteve në prag të censusit që po zhvillohet në Shkup. Presidenti i Bullgarisë ka kërkuar që shërbimet bullgare të mbrojnë pakicën bullgare në shtetin fqinj, të cilët sipas tij sulmohen dhe keqtrajtohen nëse deklarohen si bullgarë.

I menjëhershëm ka qenë edhe reagimi i Presidentit të Maqedonisë së Veriut, Stevo Pendarovski, i cili thotë se është skajshmërisht e pazakontë që një vend anëtar i NATO-s të përpiqet të angazhojë shërbimet brenda territorit të një vendi tjetër të NATO-s.

Maqedonia e Veriut ka filluar regjistrimin e diasporës, të burgosurve dhe stafit diplomatik nga 1 marsi dhe deri tani, janë regjistruar 18 mijë qytetarë. Censusi brenda territorit fillon më 1 prill. Analisti Albert Musliu thotë se kjo çështje po përdoret për fushatë zgjedhore në Bullgari.

Sipas tij, nuk ka pasur raste në Maqedoninë e Veriut, të cilat janë raportuar për keqtrajtime për shkak të përkatësisë etnike.

“Unë besoj se është pjesë e folklorit parazgjedhor në Bullgari, shumë më shumë se sa një realitet faktik, i cili në Maqedoninë e Veriut realisht nuk ka qenë prezent dhe shumica e qytetarëve nuk e dinë. Tani a ka pasur dikush problem individual, që është prezantuar si bullgar, të dalë dhe ta deklarojë, që të mund të ketë ku të bazohet edhe qëndrimi i presidentit bullgar”, tha ai.